Gabilondo Iñaki

Kazetaria

Gabilondo Iñaki

IÑAKI GABILONDO PUJOL (Donostia, 1942), lizentziatua da kazetaritzan Nafarroako Unibertsitatetik. Komunikatzaile iaioa da edozein delarik ere ikus-entzunezko eszenategia. Irrati gizona da, nolanahi, batez ere. Irratian hasi zuen bere karrera profesionala, 21 urte zituenean. Bere bizitzako programa, ia 20 urte luzez, “HOY POR HOY” izan da. Audientzien lidergoa inoiz galdu gabe, irrati jenero guztiak garatu ditu saio horretan, gaurkotasunik beroenarekin jasoaz bat hiritarren bizitza eta iritziei ateak irekitzen zizkielarik. Canal 6en elkarrizketak egiten jarraitzen du oraintxe bertan eta EL PAIS eta Cadena Sereko edizio digitaletan bideoblog bat lantzen du egunero. Ba du hainbat momentu guztiz esanguratsu bere bizitza profesionalean. Hala nola, Otsailaren 23ko estatu kolpe frakasatu hartan TVEeko informatiboetako zuzendari eta Telediarioko aurkezle bezala egindako lana. Edo GALari buruz Felipe Gonzalezi egin zioneko elkarrizketa ahaztu ezin hura. Iñaki Gabilondoren lana ulertezina da, bere jendearekin harremanetan egon eta “baliagarri izan” beharrak ahazten badira. Bere metodoa, taldean lana egitea izan da. Gaur oraindik, Gabilondok sariak jasotzen segitzen du, inoiz horrek harrokeriara eraman ez badu ere. Espainiako Gobernu Presidente guztiak elkarrizketatu ditu, Jose Maria Aznar ezik, honek inoiz bere saiora joan nahi izan ez zuenez. Objetibo izan eta profesioa konpromiso etikoz bizi nahia izan ditu beti berarekin, sinesgarritasun handiz jantzi duelarik honek kazetaria. Ezagutzera eman dituen bere iritzien artean, ba da bere bizi jarreraren adierazgarri esanguratsua den perla bat: “Pobre eta ahulekin batek ezin du neutral izan. Nahi eta ez, beren alde jarri behar du batek.”

Jardunaldiak: