Bere hitzaldian zehar, Zigor-zuzenbideari eta politika kriminalari buruzko kontzeptuak argituko dizkigu Pablok. Gai hauek izanen ditu hizpide: Zuzenbideak Ilustraziotik gaur egunera arte izan duen bilakaera historikoa, delituak eta zigorrak, zigor-sistemaren doktrina abolizionista eta justifikatzaileak, nola eta zer zigortu, espetxeak eta delitugilearen errehabilitazioa, presoen tratamenduari buruzko nazioarteko arau eta hitzarmenak, errehabilitaziorako eta gizarteratzerako jardunbideak eta zigor-arloko justiziaren eredu berriak, besteak beste, bitartekaritza eta justizia konponarazle edo errestauratiboa.

Hitzaldiaren amaieran, Pablo Ibañez txostengileak Justizia Errestauratiboaren gaiari buruz gomendatutako bibliografia duen dokumentu bat jarri du entzunaldiaren esku. Era berean, txostengileak bere hitzaldiaren testu osoa jasotzen duen dokumentu bat jarri du entzunaldi osoaren eskura.

Hitzaldi-ondoko elkarrizketarako, Gogoa Foroak Hitzaldi-osteko pilulak izeneko informazio-dokumentu bat prestatu du, kontsulta daitekeena. Gogoa Foroan ohikoa denez, Pablo Ibañezek Justizia Errestauratiboari buruz eman zuen hitzalditik astebetera, gaian interesa duten hainbat lagun bildu ginen. Jarraian, gure hausnarketa esanguratsuenak eta proposamen batzuk partekatzen ditugu.

Bestalde, hitzaldiaren harira, Pablo Ibañez hizlariari egindako elkarrizketa argitaratu da Diario de Noticias egunkarian.