Erlijioen arteko elkarrizketa ez da moda bat, behar bat eta gainontzeko sinesmen eta mundu ikuskeren aurrean norberarena kokatzeko premiazko modu bat baizik.

Buru bihotzak berritu behar ditugu lehenbailehen, denok denon aurka egotetik denok denongana garamatzan bidean jarri gaitezen, eta horrela gure baitan bizi den eta beti deskubritzear dagoen Errealitate osatuagorako bidean jartzen gaituen Misterioari esparru zabalagoa eskaini diezaiogun denon artean.

Horretarako, bestea bere bestetasunean, eta ez gure imajinazioan, ezagutzen saiatu behar dugu. Elkarrekin topo egite horrek bakarrik ernaltzen gaitu eta Misteriora eta gizatasun handiagora irekitzen.